"У беларусаў слаўныя традыцыі". Качанава наведала Спаса-Ефрасіннеўскі жаночы манастыр у Полацку

9 чэрвеня, Полацк /Алеся Пушнякова - БЕЛТА/. Удзельнікі выязнога пашыранага пасяджэння Прэзідыума Савета Рэспублікі на чале са старшынёй Савета Рэспублікі Наталляй Качанавай наведалі полацкі Спаса-Ефрасіннеўскі жаночы манастыр, які нядаўна адсвяткаваў 900-годдзе з дня заснавання, паведамляе карэспандэнт БЕЛТА.

Удзельнікі мерапрыемства наведалі святую абіцель, дзе ўдзельнічалі ў богаслужэнні, якое ўзначаліў Мітрапаліт Мінскі і Заслаўскі Веніямін, Патрыяршы Экзарх усяе Беларусі. Госці ўручылі ігуменні манастыра падарунак у гонар яго юбілею.

"Мы разумеем, як сёння няпроста. Усё, што адбываецца сёння ў свеце, - гэта страта ў многіх краінах духоўных каштоўнасцей і традыцый, гэта чужыя і навязаныя нам меркаванні. Але ў нашага народа глыбокая гісторыя і слаўныя традыцыі, слаўная вера, якая пераходзіць з пакалення ў пакаленне. Мы ўсе разумеем, як важна жыць у міры і згодзе, падтрымліваючы адзін аднаго, рабіць усё, каб захаваць суверэнітэт і незалежнасць нашай краіны", - падкрэсліла старшыня Савета Рэспублікі.

Наталля Качанава адзначыла, што на заранку станаўлення нашай незалежнай рэспублікі дзякуючы палітыцы кіраўніка дзяржавы пачалі аднаўляцца храмы і манастыры, вернікі сталі прыходзіць у абноўленыя цэрквы. "Вельмі шмат зроблена. Мы шчыра ўдзячны Беларускай праваслаўнай царкве за супрацоўніцтва з дзяржорганамі, дзяржавай", - сказала спікер.

Яна зрабіла акцэнт, што сёння дзякуючы такой плённай рабоце адноўлены ўнікальныя рэліквіі, у прыватнасці фрэскі ў Спаса-Праабражэнскім храме манастыра, і іх могуць убачыць людзі не толькі з Беларусі, але і з усіх канцоў свету.

Старшыня Савета Рэспублікі адзначыла, што супрацоўніцтва свецкай улады і духавенства накіравана на добрыя мэты. "Мы праводзім сумесныя мерапрыемствы, якія накіраваны на тое, каб у грамадстве людзі былі дабрэйшымі адзін да аднаго", - падкрэсліла яна.-0-