Стаўка на перапрацоўку дапаможа Віцебскай вобласці дабіцца поспеху ў сельскай гаспадарцы - Рагожнік

Стаўка на перапрацоўку дапаможа Віцебскай вобласці дабіцца поспеху ў сельскай гаспадарцы. Аб гэтым старшыня Віцебскага аблвыканкама Аляксандр Рагожнік заявіў у эфіры тэлеканала "Беларусь 1", паведамляе БЕЛТА.

"Рашэнні, якія выпрацоўваюцца адносна Віцебскай вобласці, на мой погляд, прывядуць нас да поспеху", - падкрэсліў Аляксандр Рагожнік.

У прыклад ён прывёў работу Аршанскага мясакамбіната, які дзякуючы прынятым мерам значна нарасціў свой прыбытак. "Мы завяршылі падбіраць праекты ў частцы мясной перапрацоўкі. Цяпер на стадыі завяршэння ўсё, што датычыцца малочнай перапрацоўкі. І мы лічым, што менавіта эфектыўная перапрацоўка пачне падцягваць сельскую гаспадарку вобласці", - сказаў старшыня аблвыканкама.

Прэзідэнт Беларусі Аляксандр Лукашэнка 27 жніўня сабраў нараду па асобных пытаннях сацыяльна-эканамічнага развіцця. Адной з галоўных тэм стала мадэрнізацыя сельгасвытворчасці, у тым ліку перадача дзяржаўных актываў у аграпрамысловым комплексе ў кіраванне новым уласнікам, уключаючы прыватныя кампаніі.

Пытанне было разгледжана на прыкладзе Віцебскай вобласці, у дачыненні да якой у пачатку года быў вызначаны канкрэтны пакрокавы антыкрызісны план. Па гэтай стратэгіі было прынята рашэнне аб перадачы Аршанскага мясакамбіната агракамбінату "Дзяржынскі" і замацаванні асобных сельгасарганізацый Аршанскага раёна за ААТ "Савушкін прадукт". З інвестарам у асобе "Савушкінага прадукта" заключаны дагавор арэнды маёмасці ААТ "Полацкі малочны камбінат" для далейшага паскоранага развіцця.

"Трэба разумець, што такія рашэнні - не падарунак прыватніку, а, хутчэй, нагрузка, - падкрэсліў кіраўнік дзяржавы. - Забіраючы перапрацоўку, трэба разумець, што табе намалююць 20-30 сельгаспрадпрыемстваў, якім трэба добра плаціць і адтуль забіраць малако на Полацкі малочны камбінат. Менавіта такая павінна быць палітыка, а не проста: "Забірай і ўсё".

Акрамя мадэрнізацыі сельгасвытворчасці і развіцця сыравіннай базы, Аляксандр Лукашэнка агучыў яшчэ адно патрабаванне да кіраўнікоў прыватных кампаній: атрыманыя грошы павінны не ісці за мяжу, а заставацца ў выглядзе далейшых інвестыцый у краіне.-0-