Стала вядома праграма Дзён Саюзнай дзяржавы на "Славянскім базары ў Віцебску"
Дырэктар міжнароднага фестывалю мастацтваў "Славянскі базар у Віцебску", генеральны дырэктар Цэнтра культуры "Віцебск" Глеб Лапіцкі раскрыў журналістам праграму Дзён Саюзнай дзяржавы на "Славянскім базары ў Віцебску", перадае карэспандэнт БЕЛТА.
Паводле слоў Глеба Лапіцкага, у бягучым годзе праекты Саюзнай дзяржавы беспрэцэдэнтныя. Праграма Дзён Саюзнай дзяржавы - гэта тры дні, якія адлюстроўваюць стратэгічныя напрамкі інтэграцыі Беларусі і Расіі, нашу культуру і духоўную сувязь.
"Калі мы будзем гаварыць пра галоўны канцэрт, то дастаткова ўсяго толькі прачытаць яго назву - "Народнае братэрства даражэй за ўсякае багацце". І ў наш час гэта самы галоўны слоган, які паказвае, што мы разам. Канцэрт будзе яркі. Збяруцца як брэндавыя калектывы, такія як хор Пятніцкага, хор Цітовіча, хор Турэцкага, "Песняры", "Сябры", спявачка Зара, так і зусім маладыя, юныя таленты. "Славянскі базар" будзе адкрываць новыя імёны, - расказаў Глеб Лапіцкі. - У той жа дзень (12 ліпеня. - Заўвага БЕЛТА) на нашай пляцоўцы, мы яе называем Пушкінская плошча, пройдзе народны праект у новым фармаце. Будуць не толькі прыгранічныя раёны Віцебскай вобласці і рэгіёнаў РФ, але ўводзіцца фармат спецыяльнага госця нашага праекта. У бягучым годзе спецыяльным госцем выступіць Ленінградская вобласць. Гэта прэзентацыя і прамысловага, і навуковага, і культурнага патэнцыялу і непасрэдна творчая праграма. Гэта будзе пятнічны дзень, ён, вядома, будзе звязаны яшчэ з прэс-канферэнцыямі, круглымі сталамі".
У суботу, 13 ліпеня, будуць прадстаўлены праекты, якія глядзяць у будучыню. "Мы адзначаем сёлета 225-годдзе з дня нараджэння Аляксандра Сяргеевіча Пушкіна. І разам са структурамі Саюзнай дзяржавы, з музеем-запаведнікам, з народным артыстам Расіі Аляксандрам Зацэпіным вырашылі адзначыць гэту дату і ўвесці новую традыцыю - "Саюзная дзяржава - дзецям". Будзе праведзена выстава Шаймарданава, правядзём розныя майстар-класы: па пушкінскім вершаскладанні і пісьме. Дзеці змогуць зразумець, што такое пісаць пяром. І ўсё завершыцца прэм'ерай праекта - новым сучасным прачытаннем "Казкі пра цара Салтана". Яна пройдзе на сцэне канцэртнай залы "Віцебск". На гэты праект будуць запрошаны хлопцы і дзяўчаты з дзіцячых дамоў, інтэрнатаў, шматдзетных сем'яў", - адзначыў дырэктар фестывалю.
"Нядзеля будзе прысвечана нашай адзінай Вялікай Перамозе. Для Беларусі гэты год - знакавы. Мы святкуем 80-годдзе вызвалення ад нямецка-фашысцкіх захопнікаў. На сцэне Віцебскай абласной філармоніі выступіць Аскар Абдразакаў з песнямі аб Перамозе, вайне, да яго далучацца акадэмічныя салісты Беларусі і Расіі. Гэта будзе вельмі добры камерны канцэрт, - падкрэсліў Глеб Лапіцкі. - Гэта мерапрыемствы, якія адлюстраваны ў праграме "Славянскага базару". Яны, вядома ж, дапоўняцца яшчэ і выставачнай праграмай. І можна задумацца пра маштаб - гэта толькі праграма Дзён Саюзнай дзяржавы".
XXXIII Міжнародны фестываль мастацтваў "Славянскі базар у Віцебску" пройдзе з 9 па 15 ліпеня.-0-
